Истанбул, 21 јули 2017 (МИА) - Турскиот претседател Реџеп Таип Ердоган ги осуди денеска коментарите на германскиот министер за економија кој ги предупреди компаниите да не инвестираат во Турција.
Тој нагласи дека турскиот судски систем е понезависен од германскиот. Во говор во Истанбул, Ердоган рече дека предупредувањето од германското МНР за патувањата во Турција е „неосновано и злонамерно“.
Тој вели дека германската Влада треба да биде одговорна за терористите кои според него, ги крие државата.
– Исклучително тешко е германски компании да прават инвестиции во Турција во сегашната политичка клима во државата, изјави вчера германскиот министер за економија Бригите Циприс.
Турција им достави на германските власти список со над 680 компании осомничени за поддршка на тероризам, јавија западни медиуми повикувајќи се на извор во службите за безбедност.
Бројката е речиси 10 пати поголема од првично соопштената од германски медиуми.
Германски „Цајт“ објави вчера дека во списокот се големи концерни како Дајмлер и БАСФ.