Белград, 25 јули 2017 (МИА) - Повикот на српскиот претседател Александар Вучиќ за широк општествен дијалог за Косово, кој ќе почне во септември, се подготвени да го прифатат САНУ, СПЦ и дел од опозицијата, пишува весникот „Блиц“.
Според белградскиот весник, еден дел од опозицијата ја прифаќа поканата, а дел инсистира на единствен став околу истата. Некои опозициски партии бараат од Вучиќ конкретно решение.
Шефот на државата најави дека покана да учествуваат во дијалогот ќе добијат сите релевантни политички партии, невладини организации, СПЦ и САНУ.
Од СПЦ порачуваат дека Црквата „со задоволство ќе му помогне на државниот врв“, а подготвеност да дадат свое мислење изрази и генералниот секретар на САНУ, Марко Анѓелковиќ.