Мустафа: ЛДК нема да коалицира со оние кои не избираат средства да бидат дел од Владата

Приштина,19 август 2017(МИА) - Косовскиот премиер во заминување, Иса Мустафа, упати остри критики кон претставниците на „Листа српска“ и кон оние кои „сакаат заедно со нив да формираат влада“.
Мустафа смета дека на Косово му е потребна влада со мнозинство Албанци, која целосно ќе ги почитува правата на немнозинската популација.
На својот профил на Фејсбук, Мустафа, лидер на Демократскиот сојуз на Косово (ЛДК), наведува дека „не се формира Влада на Косово со Радојчиќ и Веселновиќ, ниту со коцкари и криминалци“.
„ЛДК нема да соработува со оние кои не избираат средства за да бидат дел од Владата, туку ќе соработува и ќе биде дел од извршната власт единствено со оние кои не се диктирани од криминалот и од Листа српска за да владеат со Косово“, посочи Мустафа на Фејсбук.
Претходно неговиот коалициски партнер во изборите, Беџет Пацоли, лидер на Алијанса за Ново Косово (АКР), повика на формирање Влада на национално единство, за излез од политичката криза.
Партијата на Мустафа експресно ја отфрли оваа идеја на Пацоли, потсетувајќи дека во изборната платформа на ЛДК-АКР-Алтернатива стои оти нема да прифатат постизборна коалција со Демократската партија на Косово (ПДК) и дека ЛДК тој став не го менува.