„Катимерини“: Грчките дипломати загрижени поради повлекувањето на српските колеги од МакедонијаАтина, 22 август 2017 (МИА) - Грчките дипломати загрижено го следат развојот на случувањата на Балканот откако Србија го повлече својот персонал од Амбасадата во Скопје, пишува грчкиот весник „Катимерини“, пренесува Танјуг. Весникот наведува дека Белград го повлекол целиот персонал од Амбасадата, по што ја обвинил Македонија за „офанзивно дејствување“ против Србија. Според „Катимерини“, Белград е веројатно бесен, бидејќи Скопје ги унапредува односите со Приштина. Грчкиот медиум нагласува и дека Грција инсистира спорот со Македонија околу името на земјата да го реши пред таа држава да се придружи кон меѓународните сојузи. Македонската Влада соопшти дека „развива пријателски односи со сите соседни земји“, а во однос на отворените прашања „води политика на добрососедска и регионална соработка“. Сепак, што се однесува до гласањето за членство на Косово во УНЕСКО „ќе ги земе предвид ставовите на мнозинството земји од ЕУ“, пишува грчкиот весник.
|