Приштина, 24 август 2017 (МИА) – По денешниот последователен неуспех да се продолжи конститувната седница на косовскиот парламент, партијата „Листа српска“ излезе со став дека одговорноста за блокирање на формирањето на новите институции ја сносат албанските политички партии.
- Кризата, во која моментно се наоѓаме, бара договор меѓу албанските политички партии, кои се главните виновници за блокадата и неформирањето на новите институции по изборите од 11 јуни, изјави пратеникот Игор Симиќ, пренесувајќи го ставот на партијата.
Според него, Листа српска во периодот што следува ќе одлучи како ќе делува политички во иднина.
За денеска закажаното продолжение, датум што го побара коалицијата ПАН, пропадна откако истата таа коалиција преку потпретседателот на Демократската партија Енвер Хоџај призна дека го нема потребното мнозинство и побара време од две недели, за потоа да се закаже ново продолжение на седницата.