Апостолова: Заедницата на српски општини да се формира согласно Уставот на КосовоПриштина, 22 септември 2017 (МИА) - Шефицата на Канцеларијата на ЕУ во Косово, Наталија Апостолова, ги охрабрува раководствата на домашните институции да ја формираат Заедницата на општини со мнозинско српско население, но тоа, според неа треба да се направи со почитување на законите на Косово и одлуката на Уставниот суд. Во интервју за весникот „Зери“, Апостолова потсетува дека високата претставничка на ЕУ, Федерика Могерини во обраќање во Парламентот на Косово изјавила дека очекува Заедницата на српски општини (СЗО) да не биде паралелна структура, туку со неа да се инкорпорираат Србите во инситуциите на Косово и оти тоа ќе биде во полза за сите страни. Според неа, како Владата ќе се занимава со ова прашање ќе биде многу значајно за нив и оти тие овие активности ќе ги набљудуваат во следните денови. Таа во интервјуто се задржува и на други прашања, при што нагласи дека Европската унија со ниту една политичка одлука нема да се откаже од двата услова кои Приштина мора да ги исполни за да добие визна либерализација, а тоа се демаркацијата на границата со Црна Гора и борбата против организираниот криминал.
|