Во изминатите десет години најмалку 120 албански граѓани се приклучиле кон терористичката Исламска држава, а на боиштата,пред се во Сирија, се убиени повеќе од дваесет.
Овој податок е изнесен на Форумот „Граѓанскиот сектор против насилниот екстремизам“ одржан во северниот албански град Скадар,на кој посебен акцент беше ставен на законските прописи и начинот како да се идентификуваат екстремистите.
- Благодарение на законските иницијативи,годинава во Сирија не заминал ниеден наш граѓанин. Но,фактот дека сега нема, не треба да значи дека нема да има подоцна. Ангажираноста на сите повикани е неопходна. Потребни се посебни програми и политики, -изјави Клејда Нѓела од албанскиот хелсиншки комитет.
Според неа проблем и понатаму е третирањето на овие лица,посебно на лицата кои се вратиле од боиштата,но и на нивните семејства.
Албанија има усвоено национална стратегија за борба против насилниот екстремизам, лани усвои и закон со кој се забранува учество во странски војски, а за албанските државјани кои учествуваат во нив предвидена е казна затвор во траење до 15 години.