Грабар-Китаровиќ:: Хрватска може да биде посредник меѓу Русија и НАТОМосква, 18 октомври 2017 (МИА) - Хрватската претседателка Колинда Грабар-Китаровиќ воочи денешната средба со рускиот претседател Владимир Путин во Москва, изјави дека Загреб би можел да биде посредник меѓу НАТО и Русија. - Верувам дека Хрватска може да биде посредник во соработката меѓу Русија, ЕУ и НАТО, организации на кои сме членки, кои ги поддржуваат нашите заеднички вредности, а во кои ние силно веруваме. Сепак, невозможно е да се впуштиме во решавање на бројните прашања на глобално ниво без дијалог со Руската Федерација. Поради тоа, секогаш, во сите недоразбирања поддржувам дијалог, изјави хрватската претседателка во интервју за агенцијата ТАСС. Таа истакна дека е од клучна важност да се обнови дијалогот меѓу Русија и Западот. - Сметам дека дијалогот е клучен. Русија и НАТО се клучни фактори на европската стабилност и безбедност. Дијалогот треба да биде зачуван и отворен. Треба да постои доверба, изјави Грабар-Китаровиќ. - Какво и да е влошување на односите меѓу НАТО и Русија ќе има директни последици на сите аспекти на европската безбедност и стабилност, заклучи претседателката. Таа уште истакна дека и е драго што ќе патува во Сочи каде ќе се сретне со Путин и оти очекува со него да разговара за широк спектар на прашања.
|