Српската Влада одлучи сметководствените документи, вклучувајќи ги и фактурите, да не се печатат ниту да содржат печат или потпис, се наведува во соопштението на Канцеларијата за соработка со медиумите на Владата на Србија.
Одлуката е потпишана од министерот за финансии Душан Вујовиќ и министерот за трговија, туризам и телекомуникации Расим Љајиќ.
Според одлуката дека правните лица и претприемачите можат да издаваат фактури во хартиена или електронска форма. Клучно појаснување е дека не е задолжително да се печати фактурата која изворно е настаната во електронска форма, ниту пак на евентуално отпечатениот документ да се става печат за да се смета за валиден.
Електронската фактура е валидна во електронска форма, без потпис и печат, не мора да се отпечати и не мора да се испраќа по пошта.
Фактурата која изворно е настаната во хартиена форма, не мора да содржи печат и потпис на одговорното лице. Исто така, фактура која е настаната во електронска форма или преку дигитализација, исто така не мора да биде потпишана со електронски потпис.
- Примената на оваа регулатива ги елиминира огромните непотребни трошоци и го олеснува бизнисот. Заштедата на пари, хартија и на време значи побрз, поефикасен и рационален бизнис, во согласност со современите стандарди, изјави српската премиерка Ана Брнабиќ.