Косовската делегација на средбата на врвот на ЕУ и Западен Балкан во Софија на 17-ти мај ќе ја предводи претседателот Хашим Тачи, информира приштинскиот весник „Зери“.
Советникот на претседателот Тачи, Ардијан Арифај рече дека Косово ќе биде претставено на состанокот „како и сите други земји", и ја отфрли можноста земјите, кои не го признаваат Косово, да направат некакви проблеми во врска со тоа.
- Претходно имаше некои резерви по ова прашање, но Косово и благодари на Бугарија, како организатор и домаќин, како и на други држави, кои сметаа дека состанокот ќе има смисла само ако учествуваат сите земји од Западен Балкан, рече Арифај.
Тој најави дека, покрај Тачи, во приштинската делегација ќе биде и премиерот Рамуш Харадинај, како и министерот за надворешни работи Беџет Пацоли.