IDIVIDI

среда, 14.05.2008

IDIVIDI Мени

Вести / Балкан

Србија може да добие статус кандидат за членство во ЕУ до крајот на годината

Белград, 14 мај (МИА) - Србија може да добие статус на кандидат за членство во Европската унија до крајот на годината и тоа на државата ќе и донесе неколку стотини милиони евра, изјави директорот на Канцеларијата за европски интеграции Тања Мишчевиќ за весникот Блиц.

Ратификацијата на Договорот за стабилизација и асоцијација од државите-членки на Унијата според неа, нема да биде услов за кандидатурата за членство, но Договорот треба да биде ратификуван од српскиот парламент, наведува весникот.

Таа нагласи дека постои можност за забрзување на процесот на давање статус кандидат на Србија.

„Можеме побргу и од Хрватска да ги подготвиме документите кои содржат одговори за ЕУ“, вели Мишчевиќ. Хрватска доби датум за преговори за статус на кандидат еден ден откако беше пронајдено местото каде се наоѓаше Анте Готовина кој беше баран од Хашкиот трибунал зашто соработката со Трибуналот беше услов за почнување преговори со ЕУ, наведе таа.

Според неа, државата-кандидат за членство добива минимум трипати повеќе средства, а во некои случаи и десетпати повеќе.

Повикувајќи се на изјави на извори од Социјалистичката партија на Србија и Демократската партија, весникот Блиц тврди дека е многу близу постигнување договор за формирање пост-изборна коалиција. Весникот тврди дека договорот треба да биде склучен до крајот на мај.

Според весникот, договорот е постигнат и покрај големите притисоци на кои бил изложен во изминатите два дена лидерот на СПС Ивица Дачиќ. Пресинг на Дачиќ вршел во име на ДПС-НС-СРП Александар Никитовиќ, шеф на Кабинетот на премиерот Восилав Коштуница, барајќи од него постизборна коалиција СРП-ДПС-НС.

Истовремено на Дачиќ не му е оставена ниту минута од најкрупните српски бизнисмени кои се и главни финансиери на ДСС и СРС.

Бизнисмените немале лимит во ветувањата за финансирање на партијата на Дачиќ. Според информациите на Блиц, имало и уцени не само за лидерот на СПС туку и за останатите членови на неговата коалиција за да ги добијат нивните мандати за формирање влада СРС-ДПС-НС.

Претставници на коалицијата СПС-ПУПС-ЈС денеска ќе имаат разговори со претседателот на ДСС Восилав Коштуница за начинот и политичките цели за формирање парламентарно мнозинство.