IDIVIDI

понеделник, 08.09.2008

IDIVIDI Мени

Вести / Балкан

Германија може да побара активирање на предпристапните клаузули за Бугарија и Романија, тврди романски инфо сајт

Букурешт, 25 јули (МИА) - Постои можност германскиот Парламент да ја овласти Владата во Берлин во текот на претстојнава есен да побара од Европската унија активирање на предпристапните клаузули за Бугарија и Романија, тврди романскиот инфоративен сајт ziare.com.

Пред приемот на Бугарија и Романија во ЕУ на 1 јануари 2007 година, Унијата констатира дека двете земји не ги исполнуваат во целост европските стандарди, поради што во договорите за нивно челнство беа вклучени предпристапни клаузули, кои предвидуваат мерки за санкционирање доколку двете држави не ги исполнат поставените критериуми за справување со корупцијата и организираниот криминал.

Романскиот сајт наведува дека претседателот на Комисјата за европски прашања на Бундестагот, Гинтер Крихбаум изразил жалење поради тоа што во извештајот за напредокот на двете земји во исполнувањето на европските стандарди, Европската комисија не предложила активирање на претпристапните клаузули за Бугарија и Романија.

- Би сакал во случајот на Бугарија Европската комисија не само да извршеше анализа, туку и да формулираше конкретни препораки, односно итно активирање на предпристапната клаузула. За жал Еврокомисијата немаше доволно храброст да направи нешто такво, изјави Крихбаум.

Во врска со Романија, тој оцени дека оваа земја е отидена понапред во справувањето со корупцијата и организираниот криминал во споредба со Бугарија, но дека романскиот Парламент и натаму ги блокира „големите корупциски дела“, со што државата ризикува да се соочи со активирање на предпристапната клаузула.

Според Крихбаум, препораките на Комисијата сепак не претставуваат конечни решенија, бидејќи секоја земја-членка на ЕУ одделно може да предложи активирање на предпристапните клаузули.

- Сметам дека треба сериозно да размислиме за ваков предлог до Европскиот совет, изјави Крихбаум, додавајќи дека за ваквата можност Комисијата за европски прашања на Бундестагот ќе расправа по завршувањето на летните одмори, кога и ќе ги разгледа извештаите на Еврокомисијата за Романија и Бугарија.