Медал за заслуги за Македонија за фотографот и уметник Благоја Дрнков

Скопје, 30 септември (МИА) - Претседателот Бранко Црвенковски денеска ќе го одликува фотографот и уметник Благоја Дрнков со Медал за заслуги за Македонија, за врвните резултати во неговата долгогодишна професионална дејност во областа на уметничката и применета фотографија и за неговиот придонес во презентирањето и афирмацијата на македонското уметничко и културно богатство во светот. Високото признание на Дрнков ќе му биде врачено во рамките на 29. Интернационален фестивал на филмската камера „Браќа Манаки” на свечена церемонија во Домот на АРМ.

Благоја Дрнков (1914) е доајен на македонската документаристика и неприкосновен уметник во фотографското мајсторство. Со фотографирање почнал да се занимава уште како ученик. Во 1935 година го направил својот прв филм, десет години подоцна станал прв директор на Филмската дирекција на Македонија ФИДИМА и прв дописник на „Филмски новости“ од Македонија.

Снимил голем број филмски записи за животот на неговото семејство, како и филмски записи со општествено-историска вредност. Во 40-тите години на минатиот век специјализирал во студијата „Барандов“. Работел во „Вардар-филм“, потоа во Етнолошкиот музеј како фотограф, снимател и режисер на етнолошки филмови, а од 1964 до пензионирањето во 1969 година бил режисер на документарни филмови и телевизиски серии во Телевизија Скопје. Добитник е на повеќе награди и признанија, меѓу кои и на државната „11 Октомври“ за животно дело.