Хашим Тачи им се заблагодари на Црна Гора и на Македонија за признавањето на Косово
Приштина, 10 октомври (МИА) - Косовскиот премиер Хашим Тачи денеска во името на институциите и граѓаните на Косово им се заблагодари на Македонија и на Црна Гора за признавањето на независноста на неговата држава, истакнувајќи дека со овие одлуки ќе се засили регионалната соработка.
-Одлуките на Подгорица и Скопје се одговорни и се во согласност со волјата на народот на Косово за независна, суверена, демократрска и мултиетничка држава. Одлуките на Македонија и Црна Гора уште повеќе го засилуваат мирот, стабилноста и регионалната соработка, но истовремено ја засилуваат и забрзуваат интеграцијата на нашата држава во евроатлантските структури, рече Тачи на вонредната прес конференција.
Тачи изјави дека Косово ќе „гради добри односи со сите земји од регионот и ќе има конкретна соработка со Македонија и Црна Гора, како суверени и независни држави, како на билатерален, така и на мултилатерален план.
-Косово, исто така, е подготевно за соработка, во двостран интерес, со Србија, како две суверени држави, рече Тачи и додаде дека косовските институции очекуваат нови признавања на независноста.
|