Стразбур, 16 септември (МИА) - Пратениците во Европскиот парламент денеска ќе расправаат за либерализацијата на визниот режим за граѓаните на Македонија, Србија и Црна Гора, која би требало да стапи на сила на почетокот на следната година.
ЕП за либерализацијата треба да донесе „незадолжително мислење“, а предлогот за визна либерализација официјално треба да го прифатат министрите за правда и за внатрешни работи на 27-те земји-членки на Европската унија.
Се очекува ЕП во октомври да усвои резолуција на визната либерализација, за која пратениците ќе гласаат во ноември.
Правната процедура за укинување на визите би требало да почне кон крајот на овој месец во Комитетот за граѓански слободи, правда и внатрешни работи, откако Европската комисијата на 15 јули даде зелено светло за укинување на визите за граѓаните на трите држави.
ЕК и шведското претседателство на Унијата планираат процедурата во Советот на министрите да заврши до крајот на ноември, со што министрите за внатрешни работи и за правда на Советот на 30 ноември во Брисел би можеле да го усвојат предлогот на ЕК за визна либерализација за трите земји, за да потоа од 1 јануари следната година бидат укинати визите.