Атина, 5 октомври (МИА) - Јоргос Папандреу, лидерот на грчките социјалисти кои победија на предвремените парламентарни избори вчера, изјави дека претстои многу работа за преобразба на земјата.
Папандреу му се заблагодари на грчкиот народ за довербата и истакна дека „започнуваат општонародни напори за заздравување на состојбата во земјата“.
- Единствениот компас на тој пат ќе биде граѓанинот и единствено тој, истакна лидерот на ПАСОК. - Носиме огромна одговорност за промена на курсот на земјата. Сите треба да поверуваме дека ќе успееме. Не можеме да изгубиме и ден, рече тој.
Тој повика на обединување на сите сили во тој тежок момент.
Грчкиот премиер Костас Караманлис синоќа поднесе оставка од местото претседател на конзервативната партија Нова демократија по поразот на изборите.
Караманлис го поздрави лидерот на опозициската партија ПАСОК Јоргос Папандреу за победата.
Американскиот претседател Барак Обама по телефон му честиташе на Папандреу за успехот на вчерашните избори.
По пребројувањето на околу 87,65 проценти од гласовите ПАСОК освои 43,93 проценти, додека за десноцентристичката партија Нова демократија гласале 34,03 отсто.
Партијата на Папандреу освои 160 од 300-те места во Парламентот, што е доволно за формирање еднопартиска Влада.
Одѕивот на избирачите бил 70,44 проценти. Гласањето е задолжително во Грција, и покрај тоа што повеќе не се наложуваат санкции за неучество во гласањето.
Десетици илјади приврзаници на ПАСОК празнуваа изминатата ноќ по улиците на големите градови на земјата.