Белград, 6 октомври (МИА) - Рускиот министер за надворешни работи Сергеј Лавров изрази голема загриженост во врска со неодамнешната изјава на премиерот Сали Бериша „за неопходноста од сите Албанци да се обединат“, пишува денеска белградскиот весник „Политика“.
На прес-конференција по средбата со српскиот министер за надворешни работи Вук Јеремиќ, Лавров укажа на доследната и конструктивна позиција на Белград и неконструктивната позиција на властите во Приштина по повод ситуацијата во Косово, истакнува весникот.
Коментирајќи ја изјавата на Бериша, дека тој и косовскиот премиер Хашим Тачи ќе работат „на отстранување на пречките, кои ги спречуваат Албанците да се чувствуваат единствени на целата територија на која што живеат“, Лавров истакна дека тоа треба да предизвика силни реакции, пред се на ЕУ и НАТО.
- Такви реакции не слушнавме. Се надевам дека во отсуство на официјална декларација од европските главни градови, сепак, по тоа прашање, ја извршуваат неопходната работа со албанското раководство, рече шефот на руската дипломатија, додава „Политика“.