Тирана, 7 октомври (МИА) - Албанскиот премиер Сали Бериша ги отфрли тврдењата дека се залага за Голема Албанија, укажувајќи дека тесната соработка не значи автоматски приклучување на територии.
- Тоа е старо размислување. Кога земјите ќе одлучат тесно да соработуваат тоа не значи приклучување на територии. Новиот автопат го поврзува Косово со море. Тој автопат е важен и за туризмот во Албанија и важна врска за Србија и Македонија, изјави Бериша во интервју за виенскиот весник „Пресе“.
Запрашан дали балканските земји се уште, поради економската криза, се добредојдени во ЕУ, тој одговори дека моментално се потребни 27 клучеви за отворање на врата во Брисел.
- Тоа не е едноставно. Но процесот за европска интеграција на Западен Балкан е неповратен. Секако, во Унијата за тоа не постои многу еуфорија, но ЕУ им вети на земјите од нашиот регион дека ќе го одржи ветувањето, нагласи албанскиот премиер.