Премиерот Никола Груевски и неговиот грчки колега Јоргос Папандреу во петок во Преспа ќе се сретнат за да разговараат како да се избегне блокадата од страна на Грција во одлуката на Министерскиот совет на земјите членки на Европската Унија за добивање на датум за преговори, потврди владиниот портпарол Мартин Мартиновски.
Средбата меѓу Груевски и Папандреу ќе се оствари во рамките на регионалната средба за климатските промени која е закажана за петок на Преспа на грчка територија меѓу Македонија, Албанија и Грција.
Средбата била побарана од македонска страна.
Меѓународната заедница, како и опозицијата во Македонија бараа средба од вакво вид меѓу премиерот на Македонија и Грција со цел да се најде решение за името или пак да се дојде до договор по што Грција нема да го попречува патот на нашата земја кон евроатлантска интеграција.
Грчките власти во изминативе месеци откако Македонија доби препорака за отпочнување на преговори со ЕУ, категорични изјавуваа дека Грција нема да дозволи Македонија да доби датум за преговори се додека не се најде компромисно решение за спорот за името на нашата држава.
Груевски и Папандреу веќе имаа една средба пред повеќе од еден месец во Брисел.
Министрите за внатрешни работи на земјите членки на ЕУ треба да се состанат на 7-ми декември.