Белград, 10 јуни 2010 (МИА) - Српската полиција го уапси членот на Земунскиот клан, Милош Симовиќ, додека се обидувал нелегално да ја мине српско-хрватската граница кај Моровиќа.
Полицијата по Симовиќ интензивно трага веќе седум години, а хрватските власти на своја територија пред два дена ја интензивираа потрагата по него, откако беше пронајден друг припадник на Земунскиот клан, Сретко Калиниќ.
Калиниќ беше ранет, а на полиција и кажал дека во него пукал Симовиќ.
И двајцата во отсуство се осудени на по 30 години затвор за убиство на српскиот премиер Зоран Ѓинѓиќ. Тие се осудени и на по 40 години затвор во процес против Земунскиот клан и тоа поради учество во 19 убиства, три киднапирања и два случаи на тероризам.