Њујорк, 21 јуни 2010 (МИА) - Иницијативата на грчката Влада 2014 година да се одреди како рок за членство на земјите од Западниот Балкан во Европската унија ќе ја унапреди не само економијата туку и мирот во регионот, изјави грчкиот премиер Јоргос Папандреу во Њујорк, каде присуствува на дводневниот состанок на Советот на Социјалистичката интернационала (СИ).
Папандреу изрази надеж дека паралелно со европските интеграции во регионот ќе се одвива процесот кој ќе придонесе за решавање на главниот проблем кој се однесува на Косово и на спорот со Македонија.
Тој истакна дека кога станува збор за долгогодишниот спор со Македонија, познат е ставот на Грција - да се договори име со географска одредница.
Папандреу наведе дека Грција презеде иницијатива „за да придонесе за подобра клима“, додавајќи оти се надева дека преговорите со посредство на Обединетите нации ќе имаат позитивен исход.
Грчкиот премиер се осврна и на односите Грција - Турција, истакнувајќи дека двете држави неодамна потпишаа 22 нови договори. Тој најави дека ќе се сретне со турскиот премиер Реџеп Таип Ердоган во Истанбул и со вселенскиот патријарх Вартоломеј.
Папандреу осврнувајќи се на Кипар наведе дека Грција го поддржува кипарскиот претседател Димитрис Христофиас, кој вложува големи напори во преговорите, „но оти е потребен константен притисок врз турската страна со цел да се дојде до решение во рамките на резолуцијата на ОН и на европските закони“.