Приштина, 3 август 2010 (МИА) - Косово побара од ОН нова резолуција за прашањето на неговиот статус, што ќе му овозможи да се присоедини кон меѓународната организација, соопшти косовското Министерство за надворешни работи, пренесоа агенциите.
Крајната цел на Косово е да стане членка на ОН, рече косовскиот шеф на дипломатијата Скендер Хисени на средбата со генералниот секретар на ОН Бан Ки-Мун во Њујорк.
Хисени побара резолуцијата 1244 на Советот за безбедност, со која во 1999 година во областа беше воведена привремена администрација на ОН, да се замени со друга.
Неопходноста од нова резолуција за статусот се наметнува уште од прогласувањето на независноста на Косово во 2008 година и неодамнешната одлука на Меѓународниот суд во Хаг, што ја потврди усогласеноста на овој чекор со меѓународното право, посочи министерот.
До моментов независноста на Косово ја признаа 69 земји, вклучувајќи и 22 од 27-те земји членки на ЕУ и САД.