Белград, 7 октомври 2010 (МИА) - Меѓународните организации за заштита на човековите права предупредуваат дека геј парадата, која викендов треба да се одржи во Белград е сериозен тест за демократијата во Србија, откако противниците на оваа манифестација минатата година го спречија нејзиното одржување.
Официјални претставници на Организацијата за безбедност и соработка во Европа (ОБСЕ) и на Амнести интернешнл ја повикаа Владата на Србија да ги гарантира безбедноста и правата на хомосексуалците за време на парадата, но и по неа.
Ултрадесничарски екстремисти им се заканија со насилство на геј активистите. Според нив парадата е во спротивност со традиционалните вредности на Србија.
Организаторите на настанот изјавија дека парадата ќе претставува политички протест и апел да се стави крај на насилството врз малцинските групи во Србија.
Шефот на делегацијата на Европската комисија во Србија Венсан Дежер во меѓувреме изјави дека е подготвен да се изложи на ризик и да присуствува на геј парадата со цел, како што рече, да ги поддржи вредностите на Европската унија.