Белград, 10 октомври 2010 (МИА) - По неколкучасовни судири во текот на одржувањето на Парадата на гордоста во Белград во кои се повредени 124 полицајци и 17 демонстранти, приведени се 207 лица, оштетени се 11 полициски и три пожарникарски возила, полицијата воспостави ред и во градот е мирно, соопшти вечерва српското Министерство за внатрешни работи.
Според првите податоци, на собирот во паркот „Мањеж“ учествувале околу илјада луѓе кои по планирана траса се прошетале без инциденти, се вели во соопштението, во кое се истакнува дека од другата страна на повеќе локации се собрале околу 6.000 противници на овој настан кои предизвикале нереди во градот.
Во меѓувреме, српскиот претседател Борис Тадиќ најостро ги осуди насилствата, вандализмот на улиците на Белград и нападите врз припадниците на полицијата и ја потврди одлучноста на државата во заштитата на правата на сите граѓани на Србија без оглед на нивната различност.