Белград, 12 октомври 2010 (МИА) - Американскиот државен секретар Хилари Клинтон изјави денеска во Белград дека го цени напредокот на Србија во изминатите 10 години и изрази убедување дека Србија може да биде членка на Европската унија и лидер во регионот.
- Убедена сум дека Србија може да стане членка на ЕУ и лидер во регионот и затоа САД се посветени на работа со Србија за иднината на државата и целиот регион, изјави таа на прес конференција со претседателот на Србија Борис Тадиќ.
Таа му заблагодари на Тадиќ за визиите и лидерството.
- Истакнав дека заеднички интерес ни е мирот и стабилноста во регионот, државите од регионот што е можно побргу да влезат во ЕУ...Ниту една не го заслужи тој влез, не направи дополнителен напор....господине претседател, Вие тоа го направивте, изјави таа.
- Додека Србија се движи по тој пат таа ќе ни биде доверлив партнер, нагласи Клинтон.
Таа истакна дека САД ги ценат и напорите на Србија за апсење на хашките бегалци.
- Србија вложува големи напори да ги уапси преостанатите лица што ги бара Хашкиот трибунал. Тој напор мора да се цени, изјави Клинтон.
Според неа, постојат прашања за кои Србија и САД не се сложуваат како што е за Косово, но дека резолуцијата на ГС на ОН е основа за покренување дијалог кој може да придонесе за народите на Косово и Србија.
- Тој дијалог може и треба да придонесе за народите на Косово и Србија бидејќи ќе се занимава со секојдневните животни прашања, но и со долгорочните односи, додаде Клинтон.
Таа рече дека и е чест што е во Србија десет години откако народот одлучи да ја измени својата иднина.
- Таа победа е темел за долги борби за српската демократија, нагласи Клинтон. Верувам во потенцијалите на Србија и уверени сме дека Србија може да стане не само полноправен член на ЕУ, туку и лидер и пример во Европската унија и подготвени сме во тоа да помогнеме, наведе таа.