Загреб, 9 декември 2010 (МИА) - Поранешниот хрватски премиер Иво Санадер денеска ја напуштил Хрватска. Неговото заминување е регистрирано на граничниот премин Брегана на границата со Словенија во 11.20 часот по локално време, објави на интернет-страницата Дневник.
Санадер утрото не се појавил во парламентот. Според неофицијални информации, тој излегол од дома во 10.45.
Во парламентот денеска било добиено барањето на обвинителството за укинување на пратеничкиот имунитет на Санадер, а Комисијата за парламентарниот имунитет ќе заседава во 14.30 часот по локално време.
Санадер, како што јавуваат хрватски медиуми, уште вчера побарал документи од седница на парламентарна комисија за приватизацијата на ИНА.