Атина, 4 април 2011 (МИА) - Министерот за надворешни работи на Грција Димитрис Друцас денеска ги демантираше неофицијалните тврдења кои се појавија во јавноста дека либискиот лидер Моамер Гадафи би можел да емигрира во Грција.
- Не станува збор за тоа дека Моамер Гадафи ќе емигрира во Грција, изјави шефот на грчката дипломатија Друцас за една локална радио станица во Атина по повод шпекулациите во јавноста дека либискиот лидер ќе добие азил во Грција.
Овие неосновани тврдења се појавија синоќа, кога премиерот Јоргос Папандреу го прими на разговор либискиот министер за надворешни работи Абдулатиј ал Обеида. До средбата во Атина дојде по телефонски разговор меѓу либискиот премиер Али ал Махмуди со Папандреу.
Либискиот претставник Ал Обеида денеска по посетата на Грција ќе отпатува во Анкара, по што ќе замине за Малта.
Според грчкиот министер за надворешни работи Друцас, Атина е во „постојан контакт“ со режимот во Триполи како и со либиските бунтовници.
Грција има традиционално добри односи со арапските земји, како и со Либија и од самиот почеток се залага да се отворат и „дипломатски канали“ за решавање на сегашната криза во оваа земја во Северна Африка.
Резолуцијата на Советот за безбедност на Обединетите нации за решавање на кризата во Либија ја прифати и Грција, но Атина иако е членка на НАТО не учествува директно во воените операции. Таа на своите сојузници обезбедува логистичка поддршка, како и користење на нејзините бази на Крит за контрола на зоната на забранети летови и спроведување на ембарго за увоз на оружје во Либија.
Според голем број проценки Гадафи би требало да ја напушти Либија, што ќе ја отвори вратата за решавање на кризата во земјата која започна кон средината на февруари. Тоа беше истакнато и на минатонеделната меѓународна конференција во Лондон, на која беше нагласено дека Гадафи мора да ја напушти Либија, но ниту една држава се уште јавно му нема понудено азил.
Сепак, Гадафи не покажува подготвеност да ја напушти Либија, иако во еден момент се појавија шпекулации дека пребегнал во Венецуела.