Белград, 26 мај 2011 (МИА) - Ратко Младиќ е уапсен во рамки на редовните оперативни активности на органите за безбедност на Србија, а не по претходно добиена информација, изјавија претставници на службите за безбедност.
Координаторот на Владата на Србија за односи со јавност, Слободан Хомен, претходно изјави дека никој од припадниците на службите за безбедност и полицијата, нема да земе ниту цент од 10 милиони долари наградата која е предвидена за информација за криење на Младиќ, кој денеска е уапсен.
- Апсејќи го Младиќ тие само ја работеа својата работа во согласност со Уставот и законите, нагласи Хомен.
Владата на Србија во октомври минатата година ја зголеми наградата од пет на десет милиони долари која би довела до апсење на најбараниот хашки бегалец.