Прага, 27 мај 2011 (МИА) - Поранешниот главен обвинител на Хашкиот трибунал Карла дел Понте изјави дека судењето на поранешниот воен лидер на босанските Срби, Ратко Младиќ може да почне многу брзо, бидејќи обвинението е подготвено веќе 16 години.
Таа се заложи на Младиќ да му биде судено заедно со поранешниот политички лидер на босанските Срби, Радован Караџиќ, кој беше уапсен во јули 2008 година во Белград.
- Сметам дека обвинителството ќе види дали може да го обедини судењето со Караџиќ со оглед на тоа дека обвиненијата се речиси исти, изјави Дел Понте.
Дел Понте нагласи дека судењето за геноцидот во Сребреница би можело да биде обединето.
Младиќ и Караџиќ се обвинети за геноцид во Сребреница во јули 1995 година и злосторства против човештвото за време на војната во Босна и Херцеговина.
Апсењето на Ратко Младиќ е голем момент за жртвите, истакна Дел Понте.
- Ова е голем момент, не само за меѓународната правда, за Трибуналот, туку и за жртвите, изјави Дел Понте.