Белград, 27 мај 2011 (МИА) - Пред Специјалниот суд за воени злосторства во Белград денеска треба да продолжи сослушувањето на поранешниот командант на босанските Срби Ратко Младиќ, кој вчера беше уапсен во близина на Зрењанин.
Распитот беше прекинат синоќа поради „лошата психофизичка состојба“ на Младиќ.
Новинарите кои се наоѓаат во дворот на судот забележале еден адвокат како носи лекови, но не успеале да разберат дали тие се наменети за 69-годишниот генерал.
- Тој е многу блед, што покажува дека не излегувал многу надвор и тоа е една од причините за неговото успешно криење, изјави претседателот на Националниот совет за соработка со Хашкиот трибунал Расим Љајиќ.
Истражен судија во Специјалниот суд за воени злосторства ќе одлучи по распитот дали се исполнети условите за екстрадирање на Ратко Младиќ на Хашкиот трибунал.
Законската процедура предвидува врз Младиќ да биде извршен медицински преглед.