Белград, 27 мај 2011 (МИА) - Синот на Ратко Младиќ тврди дека неговиот татко преживеал два срцеви удари додека бил во бегство, има делумна парализа на десната рака и едвај зборува.
Откако го посети во затворот, Дарко Младиќ денеска изјави дека ќе побара неговиот татко да биде префрлен во болница.
Обвинителите тврдат дека одбраната едноставно се обидува да ја одложи екстрадицијата на Младиќ и дека тој е доволно здрав за да може да се води процес против него.
На полициската снимка Младиќ изгледа со истоштено лице и заматен поглед по долгите години бегство, што е огромна разлика со некогашниот лик на мускулестиот генерал, кој е обвинет дека лично ги организирал некои од најзлосторничките дела за време на балканските војни.