Белград, 28 мај 2011 (МИА) - Српскиот претседател Борис Тадиќ најави дека истрагата за случајот на поранешниот воен лидер на босанските Срби, Ратко Младиќ, ќе биде проширена со откривање лица пред се во армијата и полицијата кои му помагале сите претходни години да избегне апсење.
Тадиќ во интервју за Би-Би-Си рече дека на секого кој го штител Младиќ ќе му се суди и додаде дека поранешниот командант на Војската на Република Српска ќе му биде испорачан на Хаг без оглед на жалбата која ќе ја поднесат неговите бранители.
Српскиот претседател истакна дека Младиќ со години бил во можност да смета на поддршка на „некои луѓе во државниот систем“ и додаде оти во истрагата ќе биде посветено внимание на секоја помош која Младиќ можел да ја има во рамки на српската армија и полиција.