Белград, 6 јуни 2011 (МИА) - Пензијата на Ратко Младиќ, кој во вторникот беше предаден на Меѓународниот трибунал во Хаг, е деблокирана и неговото семејство може да располага со насобраната сума на банкарската сметка од 2005 година, изјави адвокатот на Младиќ, Милош Шалиќ.
Неговиот син Дарко веќе ја повлече сумата, околу 4,7 милиони динари (околу 49.000 евра), изјави адвокатот.
Српските власти во декември 2005 година ја замрзнаа банкарската сметка на поранешниот воен лидер на босанските Срби, кој тогаш се криеше.
Младиќ и неговото семејство официјално побараа деблокирање на банкарската сметка по неговото апсење на 26 мај во селото Лазарево во Србија.
Младиќ го ополномошти својот син Дарко да ја повлекува сумата, така што тој ќе може да ја повлекува пензијата на Младиќ секој месец. Станува збор за околу 80.000 динари (околу 800 евра).