Брисел, 7 јуни 2011 (МИА) - Српскиот претседател, Борис Тадиќ изјави денеска во Брисел дека Србија со апсењето на поранешниот воен лидер на босанските Срби Ратко Младиќ докажала дека го одржа зборот и оти сега Европската унија треба да го докаже истото.
- Време е да бидеме искрени, апсењето на Ратко Младиќ беше морална обврска на Србија, но и услов за европска интеграција. Денес ЕУ можеме да ја погледнеме во очи и да кажеме дека сме го направиле тоа што требаше да го направиме. Може ли и ЕУ да го стори истото, истакна Тадиќ, говорејќи на конференцијата во Центарот за европска политика во седиштето на Унијата.
Тадиќ додаде дека Србија е подготвена да ги почне преговорите со ЕУ и оти Унијата би требало да ја искористи сегашната можност, која е поголема од кога било.
Тој нагласи дека Србија е подготвена и оти има капацитети да одигра клучна и конструктивна улога во решавањето на сите проблеми во регионот, вклучувајќи го и косовското прашање и оти одржливо решение може да биде само тоа што ќе биде прифатливо за сите.
- Србите и Албанците мораат да се помират. Тоа е можно. Ние сме подготвени да ги пробаме сите можности, рече Тадиќ.