Белград, 15 септември 2011 (МИА) - Официјалното признавање на независноста на Косово ја дестабилизира ситуацијата во целиот свет, изјави денеска српскиот претседател Борис Тадиќ на првиот Белградски форум за безбедност.
На отворањето на форумот Тадиќ истакна дека, ако меѓународната заедница ја признае еднострано прогласената независност на Косово, тогаш во светот ќе се појават многу нови конфликти.
Тадиќ нагласи дека Косово може да стане позитивен преседан единствено доколку меѓународната заедница инсистира на дијалог и компромис меѓу Белград и Приштина.
- Многу сум загрижен од најавените за утре еднострани активности, бидејќи тоа сериозно го загрозува мирот и стабилноста на целиот регион. Тоа решение не е договорено меѓу Белград и Приштина и затоа треба да биде спречено, изјави Тадиќ во однос на најавената од Приштина намера да ја преземе контролата над граничните премини во северниот дел на Косово на 16 септември.
Српскиот претседател потсети дека меѓународната заедница се базира на правила, кои треба да важат исто за сите, без исклучок. - Овие принципи се кршат во случајот со Косово, изјави Тадиќ.
Според него, Србија ќе продолжи да работи во името на заедничкиот интерес, со цел регионот да може да биде во подобра состојба од таа во минатото, но за тоа ќе биде потребна поддршка и од меѓународната заедница.
На конференцијата се очекува да учествуваат и министрите за надворешни работи на Србија, Бугарија, Чешка и Унгарија.