Во Албанија и во Србија денеска почнува пописот на населението и домаќинствата.
На терен во Албанија се ангажирани над 15 илјади попишувачи, кои ќе треба да прибираат податоци за населението, домаќинствата и земјоделските стопанства.
За пописот, кој, како што тврди претседателот на Државната изборна комисија Генц Поло, е според евопските стандрарди, ќе бидат потрошени 14 милиони евра, осум од нив доделени од Европската комисија.
Поло, кој во Владата на премиерот Сали Бериша е и министер за иновации, синоќа уште еднаш упати апел до граѓаните „гордо и достоинствено да ги примат попишувачите и да одговорат на прашањата во пописните листи, што е многу значајно за вкупниот развој на земјата“.
Претходно претставниците на македонското и другите малцинства истакнаа дека пописот ќе го бојкотираат и оти пописните резултати нема да ги признаат, идентично како и претходниот попис. Причината за тоа е неможноста слободно да ја изразат нивната етничка и верска припадност. Против етнички попис уште од самиот почеток е националистичкото движење „Црвено црни“, кое го оспорува законот за попис зашто смета дека ваков попис е наштета на државата и нацијата.
Во Албанија на овој попис нема да се попишуваат оние кои се надвор од земјата повеќе од една година.
Во Србија од денеска почнува пописот на населението, домаќинствата и становите, кој ќе трае до 15 октомври, а првите прелиминарни резултати ќе бидат објавени на 15 ноември.
И покрај повиците упатени до граѓаните да учествуваат во пописот и да не наоѓаат никакви причини за негово бојкотирање, како што јавуваат српските медиуми, на пописот најверојатно нема да се огласат припадниците на албанската заедница од јужниот дел на Србија и дел од Бошњаците во Санџак.
Овогодишниот попис ќе биде посеопфатен од претходните, бидејќи пред граѓаните ќе се најдат прашања и за инвалидитет, брачниот статус, а предвидени се и прашања кои се однесуваат на компјутерската писменост.
Прашањата ја опфаќаат и миграцијата меѓу двата пописа со цел да се добие увид во тоа колку српски граѓани живеат во странство, колку од нив се вратиле во земјата, која е причината за заминувањето, а која за враќањето, како и колку од нив дошле од Косово.
Пописот ќе го спроведат 40 илјади попишувачи, кои беа обучувани од пет илјади општински и 300 републички инструктори. Тие ќе работат од осум часот наутро до 20 часот навечер и ќе бидат должни да го попишат секој објект.
Директорот на Републичкиот завод за статистика, Драган Вукмировиќ изјави дека секое домаќинство ќе мора да биде попишанио и попишувачите ќе бидат должни три пати да посетат некој стан, доколку претходно не нашле никого во него.
Вукмировиќ додаде дека не е потребно граѓаните да имаат лична документација, бидејќи ќе бидат попишани сите кои живеат во Србија барем една година или покусо, а не планираат да останат.
Пописот ќе чини 2,7 милијарди динари, што изнесува околу 3,5 долари по жител и претставува најниска сума во регионот. Средствата се обезбедени дел од државниот буџет, а дел од претпристапните фондови на ЕУ.
Од Втората светска војна до 2002 година во Србија се спроведени седум пописи. Пописот оваа година нема да биде спроведен на територијата на Косово.