Приштина, 17 октомври 2011 (МИА) - Командантот на силите на НАТО во Косово, генерал Ерхард Древс, синоќа го продолжи до вторник рокот, даден на Србите во Северно Косово да ги отстранат барикадите, кои го блокираа пристапот до граничните пунктови Јариње и Брњак на границата со Србија.
Претходно вчера беше соопштено дека војници од КФОР ќе ги отстранат барикадите денеска, доколку Србите во Северно Косово одбијат да ги отстранат доброволно.
Генерал Древс го одложи до вторник испраќањето доставки храна за силите на КФОР, распоредени по граничните пунктови, за да им даде уште време на граѓаните на Северно Косово да ги отстранат барикадите, се вели во коминикето на КФОР.
Во саботата генералот побара безусловен и постојан пристап до границата и предупреди дека во понеделник силите на НАТО ќе ги отстранат барикадите на мирен начин, доколку Србите не го сторат тоа.