Белград, 20 октомври 2011 (МИА) - Српскиот претседател Борис Тадиќ побара денеска од КФОР и Еулекс да се воздржат од употреба на сила, а од локалните лидери на Србите во Косово да одлучат во интерес на граѓаните.
- Барам од КФОР и Еулекс да се воздржат од употреба на сила, а од локалните лидери да донесат одлуки кои се однесуваат само на виталните интереси на граѓаните и да придонесат за зачувување на нашиот народ на Косово, а не на интересите на нивните партиски шефови кои и ова прашање дневно политички го инструментализираат со цел за идни избори, изјави Тадиќ за Танјуг.
Претседателот на Србија истакна дека „граѓаните за ниту една цена не смеат да преземат насилни акции бидејќи тие водат се да се загуби“.
- Србија бара почитување на резолуцијата 1244 на СБ на ОН и Планот од шест точки на генералниот секретар на ОН кои ја дефинираат статусната неутралност на меѓународните институции на Косово, изјави тој. Тадиќ додава дека е потребно да се обезбеди непречено логистичко снабдување на меѓународните мисии.