Анкара, 11 ноември 2011 (МИА) - Спасувачките екипи ја продолжуваат потрагата по преживеаните во земјотресот на истокот на Турција, во кој загинаа најмалку 12 лица, само три недели по разурнувачкиот потрес што во оваа земја однесе околу 600 животи.
Официјални претставници вчера ја зголемија бројката на жртвите во најновиот потрес на 12 лица, а меѓу загинатите е и јапонскиот доктор Ацуши Мијазаки, кој им помагал на преживеаните во минатомесечниот земјотрес. Од тогаш во овој регион се регистрирани уште повеќе стотици послаби потреси.
Околу 800 спасувачи се испратени во загрозеното подрачје, по потресот од 5,6 степени според Рихтер, кој во средата вечерта за погоди областа на градот Ван.
Спасувачките екипи до сега од под урнатините извлекоа 28 преживеани, но со оглед на фактот дека не се знае уште колку луѓе се под урнатините, бројот на жртви може да биде многу поголем, пренесуваат агенциите.
Илјадниците лица кои останаа без домови и натаму престојуваат во шатори, на многу ниски температури, кои во меѓувреме настапија во овој регион.