Приштина, 5 ноември 2012 (МИА) - Косовскиот премиер Хашим Тачи изјави дека платформата на Владата за разговорите со Србија е Уставот, резолуцијата на Парламентот за нормализирање на односите меѓу двете земји и декларацијата за независноста на Косово.
- Ние ќе работиме за обезбедување подобар живот за нашите граѓани во цела земја, истакна Тачи.
Запрашан за преговорите со Србија, Тачи одговори дека е многу важно што е постигнат широк политички консензус меѓу партиите и постои голема поддршка од САД и ЕУ за овие разговори.
- Овој процес ќе заврши со интеграција на Косово во ЕУ и НАТО, но и со признавање на државата од страна на Србија, нагласи косовскиот премиер.
Тој додаде дека во овој процес власта тесно соработува со опозицијата, пред се со Демократскиот сојуз на Косово и Алијансата за иднина на Косово.