Брисел, 8 ноември 2012 (МИА) - Високата претставничка на Европската унија за надворешна политика и безбедност Кетрин Ештон изјави по средбата со премиерот на Србија Ивица Дачиќ и косовскиот премиер Хашим Тачи во Брисел дека разговорите биле „отворени и искрени“ и оти е договорено наскоро да бидат продолжени.
- Нашите отворени и искрени разговори се развиваа околу различни аспекти на нормализација на односите меѓу двете страни и двајцата премиери се обврзаа дека разговорите ќе продолжат, се наведува во соопштението на кабинетот на Ештон.
- Се договоривме да ја продолжиме работата на целосната имплементација на сите спогодби и ги поздравивме резултатите од заедничката работна група за интегрираното управување на премините, што се случи на 5 и 6 ноември, се вели во соопштението.
Ештон истакна дека на средбата станало збор и за „транспарентните средства, кои Србија ги обезбедува за Србите на Косово“ и за начините на кои може да се интензивира заштитата на српското културно и верско наследство на Косово.
Двете страни, како што се наведува во соопштението, се договориле околу заедничката техничка работна група, која ќе подготви физибилити студија за автопатот Ниш-Приштина.
Разговорите, како што се вели во соопштението, се продолжение на разговорите почнати во Брисел на 19 октомври и заедничката посета на високата претставничка на ЕУ и на американската државна секретарка Хилари Клинтон на Белград и Приштина минатата недела.
- Се договоривме наскоро повторно да се сретнеме, истакна Ештон.