Атина, 13 јуни 2013 (МИА) – Грција денеска е парализирана од 24-часовен штрајк по повик од синдикатите во приватниот и државниот сектор против затворањето на државни медиуми.
Грција е во целосен информативен мрак бидејќи во штрајкот учествуваат вработените во државните и приватни медиуми. Штрајкуваат и новинарите во печатените изданија – весници и списанија.
Градскиот транспорт исто така е блокиран – нема да сообраќаат автобуси и тролејбуси, а метрото ќе запре со работа во девет часот по локално време.
Авиодиспечерите ќе штрајкуваат до 17 часот по локално време, јавуваат грчки медиуми.
Вработените во медиумите предупредија дека протестите ќе траат додека Владата не ја повлече одлуката за затворање на грчката национална радио и телевизија ЕРТ. Илјадници атињани се пред зградата на медиумот каде од вчера има концерти, а тимови по сопствена иницијатива емитуваат емисии преку интернет.