Белград, 21 октомври 2013 (МИА) - Владата на Србија го прифати денеска барањето на семејството на Јованка Броз, вдовицата на поранешниот претседател на Југославија, Јосип Броз Тито, таа да биде погребана во „Куќата на цвеќето“, каде почиваат и посмртните останки на нејзиниот сопруг.
Владата основаше Организационен одбор за погребот на Јованка Броз, а за негов претседател е именуван заменик-премиерот Расим Љајиќ.
Тој изјави дека е одлучено Јованка Броз да биде погребана во „Куќата на цвеќето“ и додаде дека на првата седница на Одборот денеска во 15 часот ќе бидат договорени деталите околу погребот.
Љајиќ изјави дека потпретседател на Одборот е генералниот секретар на Владата, Вељко Одаловиќ, а меѓу петмината членови се и министерот за сообраќај Александар Антиќ, претставници на Министерството за надворешни работи и претставници на Градот Белград.
- Во одборот ќе има и претставници на семејството, додаде Љајиќ.
Јованка Броз почина вчера во Белград на 89 години, откако на 23 август во тешка здравствена состојба беше примена во Ургентниот центар.