Приштина, 11 ноември 2013 (МИА) – Приштина го обвинува Белград дека е одговорен за нападот на гласачкото место во училиштето Свети Сава во северниот дел од Косовска Митровица на 3 ноември, објави Коха диторе.
– Нападот на гласачкото место во северна Митровица бил планиран и стручно организиран од професионалци зад кои стојат илегални структури на Србија, објави приштинскиот весник.
Министерот за надворешни работи на Косово Енвер Хоџај изјави за весникот дека одговорноста за спречување на изборниот процес на север во Митровица не може да се поврзе само со хулигани.
– Во општината Северна Митровица нападот го планирале и извршиле стручни луѓе кои уништиле изборен материјал и упатиле закани за домашните и меѓународни набљудувачи. Одговорноста за тоа не може да биде само на хулигани, и јас мислам дека зад тој акт стојат структури на српската држава, изјави Хоџај.
Тој смета дека и покрај договорот од Брисел, на северот од Косово не функционираат паралелни структури од областа на безбедноста, бидејќи тие целосно се расформирани. Хоџај вели дека Владата на Косово ја повикува ЕУ детално да го надгледува остварувањето на договорот меѓу двете држави.