Берлин, 14 ноември 2013 (МИА) – Во општината Северна Митровица не е можно да биде избран албански градоначалник бидејќи и во случај Агим Дева да биде избран, не мислам дека би бил во можност да управува со општината, изјави министерот за надворешни работи на Косово Енвер Хоџај.
– Градоначалникот и општината мора да одразуваат состав на секоја општина, етнички и демографски и милам дека тоа и ќе се случи, изјави тој.
Хоџај додаде дека бил изненаден од погрешниот начин на толкување на кандидатурата на Дева од страна на Дачиќ и првиот потпретседател на српската влада Александар Вучиќ. Косовскиот министер вели дека во Приштина им се благодарни на ЕУ, но и на српското раководство за се она што е постигнато во Косово во изминатите девет месеци, но смета дека Дачиќ, Вучиќ и Николиќ мора да бидат искрени пред своите граѓани.
– Би требало да им ја кажат вистината, а тоа е дека Србија се движи во процес на прифаќање на суверенитетот на Косово, територијалниот интегритет и постоење како независна држава, нагласи Хоџај.