Загреб, 7 декември 2013 (МИА) - Хрватскиот претседател Иво Јосиповиќ денеска оцени дека референдумското прашање поврзано за двојазичноста, кое го предлага Штабот за одбрана на хрватски Вуковар, не е согласно Уставот, истакнувајќи дека Хрватска не би смеела да оди на солуции кои ги намалуваат правата на националните малцинства.
По повод најавите на Штабот дека собрале 650.000 потписи за референдум, со кој бараат двојазичноста да се дозволи во местата каде живеат 50 отсто припадници на национални малцинства, Јосиповиќ истакна дека прво треба да се види што е собрано, бидејќи постои процедура да се утврди бројот на собраните потписи.
Запрашан дали смета дека за ова прашање треба да се изјасни Уставниот суд, што е барање на хрватските лабуристи, Јосиповиќ одговори дека постои процедура која мора да се почитува.
Штабот за одбрана на хрватски Вуковар, организација која се бори против кирилицата, соопшти дека од 17 ноември до 1 декември, собрала 650.000 потписи за распишување државен референдум.