Букурешт, 10 април 2014 (МИА) - Заедничка седумдневна воена вежба на американски и романски војници почна денеска во северозападниот дел на Романија.
Во маневрите учествуваат околу 450 војници и технички персонал од војските на двете земји, како и американски и романски борбени авиони.
Четири американски ловци Ф-16 и еден романски Миг-21 полетаа од една воена база на 300 километри северозападно од Букурешт, каде се одржува вежбата.
- Целта на вежбата е техничка и практична обука, како таа низ која минуваат НАТО силите. Конечна цел е зголемување на нивото на обука на младите пилоти, изјави командантот на романскиот 711. борбен ескадрон Адријан Моторг.
Четвртата заедничка вежба на двете земји е планирана пред избувнувањето на кризата во Украина.