Анкара, 11 април 2014 (МИА) - Уставниот суд на Турција денеска укина дел од Законот со кој се зголемува владината контрола врз судскиот систем, јавија турските медиуми.
Судот ги укина членовите од Законот, што на министерот за правда му дава големи надлежности врз Високиот совет на судии и обвинители, информираат телевизиите НТВ и Си-Ен-Ен-Турк.
Со одлуката на Уставниот суд се блокира реформата, која се оценува како дел од напорите на премиерот Реџеп Тајип Ердоган за задушување на корупцискиот скандал во земјата, што избувна во декември.
Турскиот Парламент во февруари го одобри Законот што предвидува измени во функционирањето на Високиот совет на судии и обвинители, со кои на министерот за правда му се дава последниот збор во процесот на назначување судии и обвинители.
Борбата за контролата врз Високиот совет на судии и обвинители е во основата на непријателството меѓу премиерот Ердоган и протераниот влијателен исламски проповедник Фетула Ѓулен, кој има големо влијание врз правосудниот систем и полицијата.