Нови Сад, 13 април 2014 (МИА) – Србија веќе не може да трпи и плаќа директори склони на корупција или поединци кои едвај завршиле училиште во некои подрачни одделенија, како што било пракса во претходните децении, заземајќи места на вредни и стручни луѓе, изјави министерката за енергетика и потпретседателка на СНС Зорана Михајловиќ.
Во интервју за новосадски Дневник, таа нагласи дека во Србија мерката за квалитет на кадар веќе не може да биде колку кој може да украде.
Михајловиќ истакна дека е горда што може да каже дека српската енергетика првпат од донесувањето законски прописи не доцни зад Европа, и оти се воспоставени јасни критериуми за работење во тој сектор.
Во врска со реформите на Владата таа вели дека е време на вистината да и се погледне во очи.
– Ако некоја фирма во државна соспственост не работи со децении и за тоа време постојано тоне во се поголеми дубиози, време е отворено да се каже и да видиме што понатаму да работиме...Работниците најдобро знаат колку претходни влади тие проблеми ги ставале под тепих, изјави таа. Михајловиќ додава дека меѓу 153 фирми има и такви кои имаат пазарен потенцијал, зачувана кадровска и технолошка база.