Етничките Бугари во Молдавија бараат присоединување кон Гагаузија

Букурешт, 14 април 2014 (МИА) - Етничките Бугари во Молдавија од реонот Тараклија бараат да влезат во составот на Гагаузија, ако Парламентот во Кишињев не им даде специјален статус, пишува романскиот печат.

Градоначалникот на Тараклија Сергеј Филипов изјави дека стратегијата на Парламентот на Молдавија за децентрализација, предвидува Тараклија да биде присоединета кон реонот Кахул, а тоа ќе ги направи етничките Бугари малцинство таму.

- Проблемот е дека сега во Тараклија Бугарите претставуваат 72 проценти од населението, а ако влеземе во составот на реонот Кахул, ќе бидеме само шест отсто, изјави Филипов.

Градоначалникот на Тараклија рече дека во реонот би можел да се организира референдум, сличен на тој во Гагаузија. Според него, ако Парламентот во Кишињев не му додели на реонот Тараклија специјален статус, тие ќе побараат присоединување кон Гагаузија.